Во Американскиот колеџ во Солун вчера беше промовиран меморијалниот фонд "Борјан Таневски", основан во јуни, во чест на македонскиот студент Борјан Таневски, кој почина во март годинава, од ретка болест, а ќе остане запаметен како прекрасна личност и како брилијантен студент на овој универзитет.

Парите од Фондот се наменети за стипендија, која ќе се доделува еднаш годишно, на победникот на конкурсот за есеј на тема од балканските односи и проблемите во Југоисточна Европа. На конкурсот, кој првпат ќе биде распишан есенва, ќе се натпреваруваат најдобрите студенти од овој колеџ.

Целта на конкурсот и на Фондот е да се поддржат идеите на студентот Борјан Таневски, за мир и соработка во Југоисточна Европа, на кои тој сакал да им го посвети својот живот и кариерата. Ова е првпат колеџот да формира фонд и тој да биде во чест на студент.

Борјан бил студент за пример, со големи лидерски способности, елоквентен и духовит, честопати наградуван, капитен на одбојкарскиот тим. Студиите ги завршил лани со највисок успех, но за жал, ретката форма рак на коски од која заболел ги покосила сите надежи на овој млад живот. Негово главно поле на интерес биле европските интеграции. Бил примен на постдипломски студии на реномираната Лондонска школа за економија и политички науки (ЛСЕ), како и на Колеџот на Европа во Натолин, Бриж, Белгија.

Во дворот на универзитетот во Солун е засадено дрво и е поставена спомен-плоча, која потсетува на овој извонреден талент.

Во чест на Борјан вчера во колеџот во Солун повторно се собраа неговите професори, родителите и пријатели. Фондот го промовираше потпретседателката на Владата, Радмила Шеќеринска, која по тој повод на колеџот одржа предавање за балканската соработка.

- Нема подобар начин да се сеќаваме на овој студент од овој, преку Фондот, кој ќе им помага на другите студенти - рече Шеќеринска.

Меморијалниот фонд е основан по иницијатива на професорите од Американскиот колеџ.

- Ова е голем гест спрема нас и спрема Борјан. Наградата од конкурсот ќе се доделува на 27 април, на роденденот на Борјан. Претходно, есенва, ќе се распише конкурсот. Од победникот се очекува не само да знае да пишува, туку и да може да се ангажира на полето за кое пишувал, да биде сестрана личност. Победникот ќе се избере по интервју со тројцата најдобри кандидати. Се предвидува тројцата да дојдат во Скопје и да бидат модератори на работилници на темата од конкурсот - вели таткото на Борјан, д-р Јосиф Таневски.

Во жирито за избор на најдобриот есеј ќе биде и професорката Мирјана Малеска од скопскиот Универзитет. Се очекува првата награда што првпат ќе се додели в година да не биде помала од 1.500 евра. Понатаму наградата би изнесувала и до 5.000 евра, во зависност од висината на донациите. Досега на сметката на Фондот стасале околу 15.000 евра од повеќе европски фирми. Се очекуваат донации и од македонски и од грчки фирми и институции.

Повеќе за Фондот "Борјан Таневски" може да се прочита на веб-страницата http://www.borjan.net/.

Биљана Илиќ

Утрински весник, Број 1293

сабота, 11 октомври 2003

OПТИМИСТИЧКА НАЈАВА НА РАДМИЛА ШЕЌЕРИНСКА До крајот на годинава Македонија ќе поднесе кандидатура во ЕУ Од нашиот известувач Борис Георгиевски Солун - „До крајот на годинава Македонија ќе ја поднесе кандидатурата за членство во ЕУ. Тоа ќе покаже дека сме решени да ги преземеме нашите обврски. Но, дали интеграцијата со ЕУ ќе се случи за пет, десет или 15 години не знаеме, но во секој случај, тој процес ќе се одвива чекор по чекор и во најголема мера ќе зависи од нас, од нашата волја и постигнатите резултати“, истакна потпретседателката на македонската Влада, Радмила Шекеринска, во рамките на предавањата на тема „Македонскиот пат до Европската унија“, што вчера го одржа на американскиот колеџ во Солун. Шекеринска истакна дека 2003 година ќе биде одлучувачка за иднината на Македонија. „Владата е одлучна да ги исполни обврските од Рамковниот договор, договореното со ММФ, со што ќе се отворат нови работни места во 2004 година и да се справи со корупцијата во државата“. Предавањето на Шекеринска се одржа во рамките на формирањето на Фондацијата „Борјан Таневски“ во чест на студентот кој беше еден од најуспешните студенти на овој колеџ, кој прерано го загуби животот од редок вид рак на коските. Оддавајќи му почит на младиот студент, таа рече дека Борјан Таневски е личност која воспоставила нескршлива врска меѓу Македонија и нејзината европска иднина и овој колеџ. „Тој веруваше дека неговата земја и овој регион имаат европска иднина и беше подготвен да даде сè од себе за исполнување на таа цел. Нема подобар начин за зачувување на спомените за него од оформувањето на оваа Фондација која ќе им овозможи и на други млади луѓе да го следат неговиот пример.“ Фондацијата „Борјан Таневски“ од април идната година ќе почне со доделување стипендии на млади и талентирани студенти кои се залагаат за мир и соработка на Балканот. Инаку, Шекеринска е првиот македонски државник која го посетува овој колеџ во Солун каде што студираат голем број млади Македонци.

Линк до статијата во Утрински весник